"Sorry..." - CBCP
|
Humingi ng paumanhin ang Catholic Bishops Conference of the Philippines (CBCP) sa publiko matapos masangkot ang ilang miyembro ng kaparian sa sinasabing pagtanggap ng mga SUVs mula sa Philippine Charity Sweepstakes Office (PCSO). Sa isang pastoral letter na nilagdaan ni outgoing CBCP president Bishop Nereo Odchimar, nakasaad ang paghingi ng paumanhin ng CBCP sa kontrobersya. Nakiusap din ang CBCP na huwag kaagad silang husgahan ng publiko dahil nais din nilang malaman ang katotohanan ng naturang kontro-bersya. Magugunita na lumitaw sa ulat ng PCSO na 7 Obispo umano ang tumanggap ng donasyong SUVs sa nakaraang administrasyon gamit ang pondo ng PCSO.
Senate Probe at ang pagsoli ng SUVs Inamin din ng CBCP na lubhang naapektuhan din ang Simbahan sa nasabing kontrobersya. Sa ginanap na imbestigasyon ng Senate Blue Ribbon Committee kamakalawa, nabanggit ni Cotabato Archbishop Orlando Quevedo sa kanyang opening statement na nagdesisyon ang pitong Obispo na ibalik sa PCSO ang mga sasakyan. Katunayan, kahapon ay iniwan sa parking lot ng Senado ang apat na sasakyan na binili ng mga Obispo mula sa pondo ng PCSO. Nilinaw din sa pagdinig na hindi mga Pajero ang binili ng mga obispo kundi mga sasakyan na maaring ibiyahe sa mga bulubundukin at malala-yong lugar. Anila, ginamit nila ang mga sasakyan sa paghahatid ng mga relief goods at sa pagbibiyahe ng mga may sakit lalo na mula sa mga lugar na hindi napapasok ng mga ordinaryong sasakyan. Kabilang sa mga sasakyan na iniwan ng mga obispo ang Isuzu Crosswind na mula sa diocese ni Nueva Segovia Archbishop Ernesto Salgada; Nissan Pathfinder at Mitsubishi L-300 van na mula kay Bontoc-Lagawe Bishop Rodolfo Beltran at Mitsubishi Strada na mula kay Abra Bishop Leopoldo Jaucian. Ang mga sasakyan naman mula sa mga obispo sa Mindanao ay itu-turn over sa mga awtorisadong kinatawan ng PCSO sa nasabing lugar. Maliban sa mga nabanggit na obispo mula sa Luzon, napagkalooban din ng pondo para ipambili ng sasakyan sa kanilang diocese sina Butuan City Bishop Juan de Dios Pueblos; Cotabato Archbishop Orlando Quevedo; Basilan Bishop Martin Jumoad at Zamboanga Archbishop Romulo Valles. Tanging si Salgado lamang sa hanay ng pitong obispo ang hindi nakadalo sa hearing dahil nasa labas ito ng bansa. Sa ulat ng Commission on Audit, nasa P6.9 milyon ang pondong ipinalabas ng PCSO para sa mga sasakyan ng mga obispo.(Marivic Aquino) |